الحلقة الأولى من كتاب قواعد المرور الأساسية فى مصر

تقريبا دة يعتبر أول موضوع أتكلم معاكم فيه ويا رب يعجبكم -- دى شوية نصايح يا جماعة أرجوكم تهتموا بيها و إنتوا سايقين -- و أتمنى إنكم تستفيدوا منها -- جبتهالكم من كتاب عظيم لابد يكون موجود فى أى بيت --هو قواعد المرور الأساسية فى مصر -- و ربوا ولادكم على ما جاء فيه من عبر و مواعظ -- حنستعرض معاكم فى الجزء الأول بعض ما جاء به من نظريات و حكم و عبر و مواعظ و أمثلة عليا -- و لو طبقتوها كما يجب -- يبقوا إنتوا أكييييد أكيد فى مصر

قواعد المرور الأساسية فى القاهرة
دستور المرور فى القاهرة: من خرج من داره إتقل مقداره

لو عربيتك كبيرة او قديمة إستخدم المبدأ القانونى: اللى خايف على عربيته يوسع
ملحوظة: إبعد عن سكة العربيات المخرشمة -- بيسوقوا بنظرية ضربوا الأعور على عينه

البوز بيز : اللى يدخل ببوز عربيته الأول للتقاطع هو صاحب أولوية المرور
إحرص على أن تكون صاحب أول بوز
ملحوظة: لا تطبق البوز بيز مع أى لورى او أتوبيس -- حرصا على بوزك لا مؤاخذة

الإشارات تكشف نواياك للأعداء -- إياك أن تستخدمها

لا تترك مسافة للأمان بينك و بين السيارة التى أمامك فهذا له عدة مخاطر
أولا : عربية تانية حتملا الفراغ فى ثوانى و برضه ما يبقاش فيه مسافة بينك و بين السيارة اللى قدامك -- كل اللى كسبته إنك إتأخرت لورا
ثانيا: حتدى فرصة للعيال يعملوا غرز قدامك
ثالثا: كل المشاه حيغمضوا عنيهم ويعدوا من الحتة دى
رابعا: اللى وراك حيقعد يزمر -- لو كان مؤدب
أو تسمع شوية أسامى حيوانات لو كان سواق تاكسى -- مؤدب
أو حيخبطك من ورا لو كان سواق ميكروباص -- و دول مفيش حد فيهم مؤدب

الإشارات مش معمولة علشان تنظم المرور -- معمولة علشان شكل القاهرة يبقى متحضر بس

إعتمد على العساكر -- مع تحملك كامل المسئولية لو واحد منهم شاورلك تعدى و بلدياته الناحية التانية فتح السكة للى ورا -- أو يفضل أن تستعمل البوز بيز -- راجع قاعدة 3

إذا كنت مش واقف فى الصف الأول فى الإشارة -- إعمل حسابك تزمر بشكل متواصل و هستيرى أول مالإشارة تفتح -- لإن الناس اللى قدام بيبقوا واقفين من زمان و جايز جدا يكونوا ناموا

معظم الحوادث تحدث فى التقاطعات أول الإشارة ما تحمر
كل ما عديت الإشارة الحمرا أسرع -- كل أما قلت فرصة إنك تتخبط

الشارع مكان مقرف -- سوق بأسرع ما يمكن حتى تتخلص من هذا الهم بسرعة

الناس اللى ماشيين بالراحة مرضى نفسيين يستمتعوا بالعذاب يستاهلوا اللى يجرالهم

من حقوقك الدستورية أن تركن أمام باب المحل الذى تريد أن تشترى منه
إذا سبقك واحد إبن ستين فى سبعين و ركن قدام الباب فمن حقك أن تقفل عليه و تركن صف تانى
أو تالت -- و مش مهم لو الشارع إتقفل -- إيه يعنى أما الناس تتعطل عشر دقائق علشان سيادتك تستمتع بحقوقك الدستورية -- هى يعنى الدنيا طارت وللا كان وراهم الديوان

من حقك أيضا أن تخرج من مكان إنتظارك فى أى لحظة تشاء -- إكسر الدركسيون شمال و إطلع
أى حد ماشى فى الشارع لازم يقف لك فورا -- راجع البند السابق --

و إلى اللقاء مع الحلقة الثانية